YCO KTP DAY THUCHA 2014

UNIT TINA TIEM LANG DING.(a thei taphawt chun) office of the YOUTH CO-ORDINATOR Independent Church of India No. ICI-9/13(5), Dated 10thFebruary, 2014 KTP DAY THUCHA Krista ta dinga Thalai ditum takhai, Vawisun February ni 16 a hin Lalpa Isu hmingin KTP Day chibai ka buk cheu. Kum 1981 February 16 khan Krista ta ding Thalai lo fam tah Rev. H.L Bana rawiin KTP Gen. Conference hmasa tak chu Ngurte khuo-ah lo hmang a nih. Chu chu hrietzingna ding le, hmun tin ram tina um dar Thalaihai chu lungril hmunkhat puta, Krista ta dinga kal ei chawi pei theina dinga infuituona hun ni dingin KTP Gen. Conference vawi 17-na chun February ni 16 hi KTP DAY dingin a lo ruot tah a nih. Chu zar pei chun vawisun nia ei hmang mek hi KTP DAY vawi 14-na a lo ni tah. Hi ni ropui taka a hin- Hi chen chen mi thuoitu Lalpa chu chawimawiin um sien la, Thalaihai inpumkhata ei um theina dinga hma lo latu fam tahai le hrânghlui la dam zinghai chu chawimawiin um bawk raw hai se. KTP Day hmangtuhai po poin Krista ta dinga inpekna thar ei nei seng theina dingin ka ditsakna kan hlan cheu a; KTP Day hmang thei lo, khawpui le hmun danga umhai po po khawma hi ni ropui tak hi chu Krista ta dinga inser ding le, KTP Hlapui kha ngaithlaa inpâkna thar nei seng dingin ka ditsakna kan hlân bawk cheu. Suol leia hliem tuorin châu châng um sienla khawm, hmathlir (vision) thar leh Pathienin a mi thuoi pei. Central Choir-hai khawm hringna thar le hla tharin Pathien an inpâk a; K.Bethela Rawbil project khawma nasa takin hma a sawn a, Hmarkhawliena THALAI IN khawm bawl el thei dinga hma lak mêk a nih. THALAI IN-a thlarau saltânghai sansuokna dinga sum hnar thar Birthday Gift khawm mi tam takin an hung inhnik nghal a; ODC khawm zaah za (100%) pe ngei dinga hma lâk mêk bawk a nih. Five Year Plan thupui PUITLINGNA ti khawm bawzui el dinga sukfel vawng a ni tah. Technology hmanga rawngbawlna khawm buotsai a nih a, Y.C.O a inthawka thu pawimawhai hriet theina dingin ICI THALAI KANTU tiin facebookah group ei hawng ding a na, facebook account nei taphawthai chun zawm seng dingin ka ngên bawk cheu. A tawp taka chun a hnuoia point pathumhai hi KTP DAY-a ka thucha ni raw se. i)Mipui tamtakin ‘thukhir’ an ngaithlak leiin Isu an fe hmangsan a, Peter ruok chun, ‘Lalpa, tukuom dang am feng kan ta?’ Nangin chatuon hringna thu i nei an nawm” a ti ang khan; Thalaihai hin ei rilremnaw zawng ei chungah a lo tlung khawma Isu hi fe hmangsan ngai nawng ei tiu(Jh.6:66-68). ii)Gadarin rama mi po poin Isu chu an kuoma inthawka fe hmang dinga an ngenlai khawmin, khawhri i suoksanpa ruok chun Isu kuoma um zing a ngen ang khan; mi tamtakin Isu hi nghawk hlakhai sien khawm, khawvel zantienga Thalaihai ruok hin chu Isu kuoma um zing hi ei duthusam ni zing raw se (Lk.8:37,38). iii)Mi tamtakin kraws lampuia an inphatsan laikhawma, Simon,Kurini rama mi'n Krista kraws a hung putpui ang khan; an hawina hmun chaua KRISTA TA DINGA THALAI niloin, mihaiin an inphatsan tak hnung khawma KRISTA TA DINGA THALAI ni dingin inpethar seng ei tiu(Mt.27:32). Krista ta dinga in Thalai chanpui, Rev. H.P Runremthang, Y.C.O.