NUPA CAMP 2014

NUPA CAMP
L.Muolhoi ICI Kohran chun Presbytery-in Year Planner a nei hlak angin Local Year Planner an nei ve hlak a. Chutaka chun, hieng- Teenagers’ Meet, Students’ Meet, Govt.Workers’ Meet, Music Hapta tihai bakah Camp chi hran hran hmang nei hlak a ni a. Tukuma dingin NUPA CAMP khawm buotsai dinga ti a ni ang takin Sept.30 – Oct.2 sung hin hlawtling taka nei a nih.
Resource Person(Speaker) dingin duthusam taka thlang-Nupa Hringnun thu hril dingin Upa Dr.H.L Liensang, Moderator, ICI le Message & Counselling thu hril dingin Upa Evanjohn, NPT Co-ordinator hai fiel an nih a. Fiel an nina ang taka an hunhluhai inhlana L.Muolhoi ICI Kohrana nupa hai ta dinga Camp Speaker dinga an hung thei leiin an chungah lawm thu ei hril a nih.

Upa Dr.H.L Liensang chun Nupa Hringnun, Practical taka hmang nghal ding thil tamtak a hril a, hriet ngainaw le inmawlna leia harsatna tamtak siem theizie le chancthatna ding tamtak ei chaan el thei danhai a hrilin camper-hai a sukphur thar hle’n an lang. Chun, Nupa nun thu le Nuhmei-Pasal mawphurna chi dang danghai a hrilin mi a hne hle bawk. Chun, Pathienthu tienga rawngbawlna a neina bakah taksaa natna nei tamtakin Pu Liensang chu panin an hlawkpui hle bawk a nih. A hunawl neisun chu dawmnaw en a ni ringawt nawk el a nih. Taksa le Thlarau hlawkpuitu an tam hle’n hriet thei a nih. Lalpa malsawmna a nih.

Chun, Upa Evanjohn khawmin Mihriem a tunga lawn taphawthai SUOL ei ni ziet, ei ni dan le SUOL BUL feltaka hrilin mitamtak camper an fie uoi uoi a. Suolnaa inthawka ISU KRISTA’N intlanna-Sandamna tluontling a boutsai thuhai thiemtak, hringtak le hnesaw taka a hril chun camperhai lungril a themin a hne em em-in an lang.

Hi Nupa Camp-a hin nupa tuok 53(mi 106) le mimal 6(rengin mi 112) campers an um a, fak le dawn tieng khawm a hnieng hnar, Thalai Pawlin hnesaw takin an nu le pahai fak ding an buoipui mup mup, Thu le HLa, Fak le Dawn-ah a tha vel vawng a nih. LALPA ZAR VAWNG ANA, PATHIEN KUOMAH LAWMTHU EI HRIL.

Zing tarik 3 Sept hin L.Muolhoi ICI Local Committee poin a hranpa lieuin hotuhai(Speaker-hai) Local Office-ah inpawlpuina le bufakpuina la nei an ta, zana rawngbawlna an la sunzawm nawk ding a nih.
Chu, hi zo char hin Retzawl-ah Camp hmang dingin ei Hotuhai hi an fe nawk pei ding ani leiin ei tawngtaina-ah lo hei san pei ei tiu.

L.MUOLHOI ICI KOHRAN BEIRUOL REPORT

SEPTEMBER BEIRUOL means INPUMPEK BEIRUOL 2014
(Lower Muolhoi ICI September Beiruol Report)

ICI Kohranin ei lo thawdan hlak angin September Beiruol thaphut hi a changin thaphut ei thei ang anga thawin tangka sum ei pek hlak a. A changin Local tinah TARGET ding dam ei siem hlak a. Cuong angin L.Muolhoi ICI Kohran khawmin 2013 hnungtieng khan chuh Target nei a lo ni deu hlak a. Pathien zar chauin Target siema um zat zathai chu pek tlakpei a ni hlak a. Amiruokchu, awlsam taka target tlak el chu a ni der nawh ti ruok chu mipui hriet ei nuom. Beiruol sunga inkhawm thawlawm po po belkhawm khawmin a tlinnaw chang chun Local Committee-in bawzuiin a hranpa damin sumhmuna dang an la ngaituo a, Target peka umzat chu ieng ang khawmin tlak ngei ngei chu tum hlak hrim a lo nih.
Rs.60,000/- target pek kan ni tumin hne kan inring der nawh a, amiruokchu, amak khawp el Pathien zarin kan tlak bak niloin kan khum rak el chuh! Lalpa ropui phawt sien. Kum 2012 a inthawk khan vengbuka Thawlawm hai le Attendance inhrietpawna dingin Information Centre pakhat Mobile SMS hmangin siem tan a ni a.Chutaka inthawka chun vawisunni chen hin sms information chu hmang a nit a pei a nih.
Chuonganga L.Muolhoi ICI hmalakna chun nikum 2013 khan inringnlawkna um met met loin September Beiruol Rs.2,06,049/- zet thawsuok a ni el chu mak le ropui kan ti tawp thei nawh. Kha kum khan THAWLAWM REVIVAL nasatakin a tla a nih ti naw chu intum ding dang a um naw a nih. Hi khawm hi Lalpa thaw a nih.
Tukum 2014 a hung tlunga, September Beiruol ei hang hang tan ding khan a kohran member tukhawmin 2013 a thawlawm thawsuok zat Rs.2,06,049 hi thawsuok thei ding khawmin inringna a um ta der nawh a. Local Committee khawmin, vengbuk committee-hai khawmin “Ei hril theinawh, Pathien mi thuoi dan dan a ni el ding a nih” tia Pathiena innghat ti chau naw chu ringna huoisen khawm nei an tak hle el. Lungril ruk tak ruok chun nikum 2013 a mi phaknaw inlau ngawi ngawina a um zing bawk, hawphur vieu si, Pathien kan bel el chu a nih.
Chuong anga hma hang la tanin L.Muolhoi ICI Kohran chun Kohran Inkhawmnaw zan po chu vengbuka inkhawm nawk nisien tiin a rel a. Chuong angin Sept.2 a inthawk khan vengbuk inkhawmna chu Thawtanzan, Thawlezan, Ningazan le Zirtawpzan haiah hmang a hung nit a pei a. Pathien malsawmna kan dawnghaia inthawka 2014 SEPTEMBER BEIRUOL THAPHUT a telpuia kan hmusuokpo chu Rs. 2,40,937/- ani a. Nikum 2013a mi Rs.34,888/- in kan khum thei a nih. Hieng zat zat malsawmna mipetu chu ei Pathien, ama ta dinga inpetuhai kuoma tiktlaina pea mithuoitu PA, PATHIEN kuomah lawmthu kan hril takzet.

Vengbuk panga(5)a inthawka Beiruol Thawlawm hmusuok zathai(Vawi 13 inkhawmna-ah):
1.Gilgal veng =Rs.20,237/-
2.Zion veng =Rs.27,666/-
3.Kanaan-A =Rs.45,510/-
4.Kanaan-B =Rs.60,200/-
5.Bethany =Rs.74,573/-
6.Biekin =Rs.12,751/-
7.G.Total =Rs.2,40,937/-
8.2013 khumna =Rs.34,888/-

THAWLAWM HMUSUOKDAN THUA NGAIDAN THENKHAT:
Nikuma kan thawlawm thawdan kha kan thawlai khan mithekhatin “Pathien Thu a um nawh” an ti zeu zeu a. Tukum 2014 a mi khawm “Thawlawm ringawt, thawlawm ringawt, Pathien Thu a thang nawh, Grant sell zawr thiem mana thawlawm tam mei mei a nih, mihriem insukphurna leia thawlawm a tam mei mei a nih” tihai ang chi hi an leng nawk nawk a. Hienglaia hriet ding pakhat pawimaw deu el chu- a sawiseltu le a hrilsetuhai hrim hrim chu kohrana lungawina neilo hai hrim anna, a petu le a thawlawm thaw tam tamhai pakhat khawm an chier ri hriet ding a um der naw a, an pek leia an lawm lem thu ngawt hriet dingin a um lem hlau. Chu chu Lalpa, Pathien sinthawdan a nih. Inkhawmnaa chun a tangka sumfaia thawlawm ding neinawhaiin an nei ang ang- thlai, hmeruo, thuomhnaw le a dang dang an chawi khawm a. Inkhawmn hunah thawlawm po po inhlan thieng vawng hlak ana. Hunser hmang a ni vawng hnungin thuomhnawhai chu mitlawmngaihai kuomah, an nuomna ang anga inchaw dingin zawr a ni hlak a. Midang damin an lanchawk nawk sawngin inchawk-inlan thaw chang a um bawk. Chuonga anga Fellowship nei pum zinga thawlawm thaw chun ring nek daia tam hia lo ni pei el hlak a, chu chu Pathien sinthaw takmeu a nih. An chaw theinawtu khawmin an chaw theitu ta dingin thafanna, chawkphurnna a lo pek a, a la theitu chun lawm takin a lak pei el hlak a nih. Chuleiin, hieng anga thawlawma rawngbawlna tienga inchawphurna hi ei Pathien Thu(BIBLE) khawm 2 Kor.9:2b ah ei en chun ei hmu a nih’”...chuongchun, in thahnemngaina chun anni laia mi tamtak a chawkhar tah a.” ti angin.
Chuleiin, 2014 SEPTEMBER BEIRUOL hi L.Muolhoi ICI kohran chun “INPUMPEK BEIRUOL” dam an tit a hiel el a nih. Asanchu, nei lei el a thawthei khawm ani nawh a, midanghai thahnemngaina leia inchawkharna lei a nih.(2Kor.9:2b). An thawlawm ding an ngaituo ngawi ngawi a, an nei sin aw chun lampui dang(Inhlawna, thilzawr etc) an zawng el a nih. Chu chu ei Pathien Thu chun, “an thei tawk neka nasa lem hmanin, an ni thu thuin an pek...”(2 Kor.8:3).
Chuleiin, SEPTEMBER BEIRUOL means INPUMPEK BEIRUOL ei ti el ta a nih. Lalpa’n mal sawm raw seh. Amen.

KTP HAI MUOLHOI HIGH SCHOOL BANG RAWNGNAL INHLAW NEI A NIH

Tarik 22 October 2014 ni hin L.Muolhoi Unit KTP chun Muolhoi High School wall rawng nalin inhlawna nei a nih. Thalai mi amtak inhlawnaa hin thang a nih.

A THA IE

REV.THANGNGUR AWARD CHUNGCHANG THU

REV.THANGNGUR AWARD CHUNGCHANG THU:
Ei Presbytery Thalai Pawl chun Golden Jubilee ei hmang ding le inzawmin SOLO INRUOLSIEKNA khawm ei nei nawk ding ana. Presbytery Musical-in hi huna thang thei dinghai zawngna VOICE HUNT a buotsai chu zo fel a lo ni tah a. Musical Society-hai chungah ei lawm takzet. Tuta ei hmabak chu GOLDEN JUBILEE VOICE AWARD dawngtu dingtak zawngna FINAL ROUND ani a. Chu chu Thalai Pawl Presbytery Conference-cum-Golden Jubilee Celebration January 2015 khin ei nei nawk ding a nih. Chuleiin, FINAL chau ei bak an ta leiin VOICE AWARD dawngtu tak chu Thalai Gen. Conf. 5th – 8th Feb. 2015 khin Sakawrdai(Mizoramah) Inrulsieknaah a thang ding a nih.
1. Presbytery tina Solo Competition-a FIRST latu chau thang thei a tih.
2. KTP General Conference huna Solo Competition pakhatna latu chun First Prize bakah Rev.Thangngur Award dawng a ta, sumfaiin Rs.5000(sang-nga) dawngsa bawk a tih.
3. Hi inruolsieknaa thang ding hin Presbytery Hrietpuina le Presbytery-a Lawmman lakna Certificate(Xerox copy) CKTP-ah peng a tih.
4. Kohran(Local) direct-a Headquarter le inzawmna neihai chun an Unit-a Solo Competition-a a pakhatna latu chu thang el a tih.
5. Judge le Host dinghai Central Committee in ruot a tih.
6. Mark pek dan ding chu Judge-hai thu thu.
7. Music Tract/Live Music hmang thei ning a ta, Sound Adjustment-in mark phur a tih.
8. Incheina le thienghlim le inzaumin MARK phur a tih.
9. 3rd Round buotsai ning a ta, round tinah hla dang inbuotsai pei ding.
10. Modern Song chau nilo, Traditional Song(Independent Hla) pakhat bek an buotsai ngei ding.
11. Mipui vote lakni naw nih.
12. Judge-hai question dawn theinaw a nei ruok chun a umna Presbytery haiin thangpui thei an tih.

THALAI EXAM HUN DING

Assam Hills Presbytery Kristien Thalai Pawl Subject Ichuklai PHILIPPI & KOLOSSA ziek Unit tinin ei inchukzo phuor tah ei ringa. THALAI FINAL EXAM hun dingin November 11, 2014(Thawlezan) a ni ding a nih ti ei hung suklang a nih.
INCHIK BELSA DINGHAI:
1. Question siemtu: P/Pastor Lalramtan, Muolhoi
2. Answer Entu ding: P/Pastor Lalramtan, Muolhoi
3. Invigilator ding: Unit umna pei Local Chairman/Secretary.
4. Answer Paper chu Invigilator-in answer entu ding kuomah submit a tih.
5. Answer Paper submit hun ding(Last Date): 16th Nov. 2014(Presbytery Conference-Doiheng-ah/Check-tu ding kuomah)
6. Thalaihai a tam thei ang tak Exam tum seng ei tiu.
Sd/- Lalnghatlien Joute,
Secretary, AH_PKTP
Dt.19/10/14